Cape Town (Dawan): Wasiirka Arrimaha Dibadda iyo Iskaashiga Caalamiga ah ee Somaliland Maxamed Biixi Yoonis, ayaa kulan la yeeshay Madaxweynaha dalka Koonfur Afrika Jacob Zuma oo uu dalkiisu martigeliyay shirkii ku saabsanaa dhaqaalaha qaaradda Afrika (World Economic Forum on Africa) oo muddo seddex maalmood ah ka socday magaalada Cape Town ee dalka Koonfur Afrika. Wasiir Biixi, oo ka qayb galay shirkaasi ayaa kulanka uu la yeeshay Madaxweyne Jacob Zuma waxay si kooban u wadaageen hadal kadib markii uu soo dhamaaday Ajandaha lagaga hadlayay aragtiyaha ku aadan kaabeyaasha dhaqaalaha Afrika ee mustaqbalka.
Sida lagu sheegay war qoraal ah oo xalay ay soo saartay wasaaradda arrimaha dibadda ee Somaliland.
War-saxaafadeedkaasina waxa uu u dhignaa sidan: “Wasiirka Arrimaha Dibadda iyo Iskaashiga Caalamiga ah ee Somaliland Mudane Maxamed Biixi Yoonis oo ka qaybgalay shirkii lagaga hadlayay dhaqaalaha qaaradda Afrika (World Economic Forum on Africa) oo muddo seddex maalmood ah ka socday magaalada Cape Town ee dalka Koonfur Afrika, ayaa la kulmay Madaxweynaha dalka Koonfur Afrika Jacob Zuma oo dalkiisu martigeliyay shirkaasi.
Wasiir Biixi iyo Madaxweyne Jacob Zuma waxay si kooban u wadaageen hadal kadib uu soo dhamaaday markii Ajandaha lagaga hadlayay aragtiyaha ku aadan kaabayaasha Afrika ee mustaqbalka.
Waxa kale oo Wasiirka Arrimaha Dibadda Maxamed Biixi Yoonis ka qaybqaatay Ajandihii lagaga hadlayay nabadgelyadda qaaradda Afrika iyo Ajandeyaal kale oo dhammaantood khuseeyay arrimaha Afrika ee dhinacyada dhaqaalaha, caqabadaha ka jira xagga wax-sosoaarka wershadaha, diyaarinta hoggaamiyeyaasha waajahaya carqalabadaha nabadgelyadda mustaqbalka. Wasiirka ayaa dhiniciisa wuxuu aad uga hadlay heerarka sarreeya ee shaqadda iyo nabadgelyadda ka jirta mujtamaca dhalinyarada ah ee qaarada Afrika iyo fursadaha xadidan ee horumarinta xirfadaha iyo shaqada oo uu ku tilmaamay inay caqabad ku noqonayaan xasiloonida. Waxaanu soo jeediyay tallooyin badan oo dhibaatooyinkaasi xal u noqon karra. sida siyaasado waafi ah oo dawladuhu ka yeeshaan xagga wax ka qabashadda, sinnaan la’aanta, horumarinta waxbarashada, xirfadaha iyo dhiirrigelinta maalgashiga dibadeed ee tooska ah.
Dhinaca kale waxaa ka mid ah masuuliyiintii ay Wasiirka ka wada qaybqaateen doodaha kala duwan ee ajandeyaashan sare masuuliyiin xilal sare haya, oo metelyay wadamada koonfur Afrika, Malawi, Canada, Uganda, Uk iyo dhinacyo kale.
Sidoo kale, wasiirku wuxuu waraysi faahfaahsan siiyay qaar ka mid ah Warbaahinta Caalamiga ah sida telefishanka CNBC, taasi oo uu kaga hadlay nabadgelyada Jamhuuriyadda Somaliland ku naaloonayso.
Sida ay hal-bawle ugu tahay nabadda iyo xasiloonida gobolka iyo qaaradaba iyo weliba iyo qorshayaasha mudnaanta leh ee dalka dhinacyada horumarka iyo siyaasadaba oo uu tusaale badan kaga jawaabay.”
