Hargaysa (Dawan): Xulka kubadda cagta ee gobolka Buuhoodle uga qayb geliya tartanka ciyaaraha goboladda oo bishan ka bilaabmaya magaaladda Boorama ayaa habeenimadii xalay soo gaadhay caasimadda Hargaysa.
Xulkan kubadda cagta Buuhoodle oo ka kooban 24 xubnood, oo isugu jirra macalinka tababaraya iyo isuduwihii gobolka Buuhoodle ee wasaarada dhalinyarada iyo ciyaaraha, si ay ugu diyaar garoobaan tartanka goboladda Somaliland ee kubadda cagta.
Xulka kubadda cagta ee Buuhoodle oo uu hogaaminayo Maxamed C/raxmaan oo ku magac dheer Looddo, oo ah macalinka xulka kooxdaasi oo ay la socdeen qaar ka mid ciyaartooyadda xulka kubadda cagta ee Buuhoodle uga qaybgelaya ciyaaraha goboladda ayaa shalay nagu soo booqday xarunta wargeyska DAWAN waxaanay ka warbixiyeen sida ay ugu diyaar garoobayaan tartankaasi iyo sida ay isugu diyaariyeen.
Maxamed C/raxmaan, oo ku hadlayay afka xulka Buuhoodle ayaa faahfaahin ka bixiyay safarkoodda ay ku yimaadeen Hargaysa iyo waxa uu qorshahoodu yahay. Waxaanu yidhi “Maalinimadii shalay (doraad) ayaanu ka soo ambabaxnay xarunta gobolka ee Buuhoodle, anagoo ah xulkii gobolka oo dhamaystiran, maamulkii iyo ciyaartoygiiba, waxaanuna nahay 24 xubnood oo ciyaartoy ah, aniga oo ah macalinkii kooxda iyo isuduwihii gobolka Maxamed Cabdi Xiis.
Ku tallo-galkayagu maanta (shalay) waxa uu ahaa nasasho. Sidaa darteed cid aanu is-aragnay ma jirto, wasaarad ahaan, guddi qaban qaabo iyo masuuliyiinta gobolka Buuhoodle ee xukuumada ugu jiraba, xilliga loo iclaamiyey inay ku soo xeroodaan xulalka goboladu. Waxaanuna qaabka shaxda goboladda loo diyaariyey aanu kulamada ciyaareed ku qorshaysanahay in aanu Boorama kaga qayb geli doono”.
Dhinaca kale tababaraha xulka Buuhoodle waxa uu ka hadlay waxyaabo ay u baahan yihiin ka hor inta aanu bilaabmin tartanku, sida garoomadii ay tababarkooda ku sii qaadan lahaayeen, kubaddo, dhaqaale iyo waxyaabo kale. isagoo sheegay in aan weli wax dejin ah loo sameynin balse ay iyagu iskood ilaa hada isku maamulayaa.
“Inta aanu ognahay muddo 10 maalmood ayaa ka hadhay qabsoonka ciyaaruhu sidaas darteedna aanu u baahanahay in aanu helo Garoon aanu ku sii dhamaystirano tababarkayagii noo socday. Sidoo kalena ma wadano wax aanu tababarka ku sii qaadano sida kubadihii, maaliyadii iyo dhamaanba agabyada is-boorti ee lagama maarmaanka u ah koox tartan ka qayb gelaysa. weli wax dejin ah oo la noo sameeyayna ma jirto, anaga ayuunbaa ilaa hadda isasii maamulayna” ayuu yidhi Maxamed C/raxmaan.
si kastaba ha ahaatee xulka gobolkan kubadda cagta eek a socda Buuhoodle ayaa noqonaya kii ugu horeeyey ee ka qayb gala tartan ciyaareedka sanadkan 2015-ka
By: Faysal Axmed Kaarshe
Dawannews Hargeysa office
