Laascaanood(Dawan): Masuuliyiinta gobolka Sool iyo kuwa degmadda Laascaanood ayaa shalay si wada jir ah u dhagax-dhigay dhismaha xarunta wasaaradda caafimaadka ee gobolka Sool, iyadoo ay noqonayso dhismihii u horeeyay oo wasaaradda caafimaadka Somaliland ku yeelato Laascaanood.
Dhagax dhigga dhismaha xarunta wasaaradda Caafimaadka gobolka Sool, waxaa ka qayb galay Masuuliyiinta Gobolka Sool iyo kuwa Degmada Laascaanood,madaxda Wasaaradda ee heer gobol iyo masuuliyiin ka socday sanduuqa horumarinta Somaliland ee SDF.
Maayarka Magalaadda Laascaanood Cismaan Saleebaan Jaamac, oo ugu horrayn ka hadlay madashii dhagax dhigga xarunta wasaaradda Caafimaadka gobolka Sool, waxaanu ka waramay muhiimadda ay leedahay bulshadda ku dhaqan guud ahaanba gobolka Sool iyo kuwa kale ee u dhaw.
Maayarku waxa uu si weyn ugu mahad naqay nin muwaadin ah oo magaciisa la yidhaahdo Oomaar, ninkaasi oo ugu deeqay dhulka laga dhisayo xarunta ay wasaaradda caafimaadku ku yeelanayso Laascaanood.
Duqa Laascaanood Cismaan Saleebaan Jaamac, oo arrimahaasi ka hadlayayna waxa uu yidhi “Waxaynu dhagax dhigaynaa Xaruntii Wasaaradda Caafimaadka ee gobolka Sool. Waxaanan ka dinac dhisaynaa halkii ay ka dhisnaayeen sideedii wasaaradood ee aynu hore u dhisnay isla markaana saddex kale dhulkoodii loo hayo. Dhulkaana waxaa bixiyay muwaadinka la yidhaahdo Oomar, waanan uga mahad celinaynaa dhulkaa uu ugu deeqay in wasaaradaha loo dhiso.”
Sidoo kale masuul ka socday Sanduuqa Horumarinta Somaliland ee SDF oo maalgelinaya dhismaha xaruntaasi oo isna halkaasi ka hadlay ayaa ka mahad celiyay dhulka muwaadinku ku wareejiyay ee laga dhisayo xarunta wasaaradda Caafimaadka ee gobolka Sool.
Waxaanu ballan qaaday in ay si dhakhso ah u bilaabayaan dhismaha, una dhamaystiri doonaan isla markaana ay noqon doonto Xarun deg deg u hawl gasha.
Guddoomiye Ku-xigeenka gobolka Sool, oo isna halkaasi hadal kooban ka jeediyay ayaa balan qaaday in ay bilaabayaan dhismeyaasha saddexda wasaaradood ee ay hadda dhulkii laga dhisi lahaa u hayaan, dhulkaasi oo uu ku deeqay muwaadin Oomaar.
Ninkan muwaadinka ah ee magaciisa la yidhaahdo Oomaar ayaa 7 xarun wasaaradood hore ugu deeqay dhulkii loo dhisi lahaa, kuwaasoo saddex ka mid ahaa hore loo dhisay. halka wasaaradda Caafimaadkana xarunteeda shalay la dhagax dhigay, iyadoo saddexda kalena dhawaan la bilaabo doono dhismahooda.
Faysal Xiis Weerar(Afgaab)
Dawannews Hargeysa office
