Hargaysa (Dawan): Madaxweyne ku xigeenkii hore ee Somaliland Axmed Yuusuf Yaasiin ayaa ugu baaqay xukuumadda in ay gacan adag ku qabato, isla markaana tallaabo sharci ah ka qaado cid kasta oo isku dayda in ay khal-khalgeliso amaanka iyo xasiloonida dalka.Waxaanu sheegay in dawladnimada loo sameeyay in dadku ku kala bad-baadaan, isagoo tilmaamay in Xukuumadu u xilsaaran tahay wax ka qabashada falalka xun-xun ee dalka ka dhaca.
Axmed Yuusuf Yaasiin oo shalay warbaahinta kula hadlay Magaalada Hargeisa ayaa dhinaca kale waxa uu soo dhaweeyay qaabka ay koomishanka doorashooyinka u wadaan diiwaangelinta codbixiyayaasha ee dalka ka socota.
Isagoo arrimahaasi ka hadlayayna waxa uu yidhi “Markii aynu isku nimid ee dawladnimadda Somaliland la sameeyay, waxaynu dhisanay dawlad leh haykalkii dawladnimo oo saddex tiir ka kooban, fulintii, baarlamaankii iyo gar-soorkii ayaan samaysanay . sharci ayaynu samaysanay aynu umaddeena ku kala hagno. marka ay wax dhacaan ama nin qaranka ka tirsan la dilo in la yidhaahdo ayaa reer hebel ah, waa xaaraan taliyahaasu qaranka ayuu ka dhintay. Dawladana waxa loo doortay oo meesha loo saaray in wixii qaranka ka hor imanaya ay gacan birr ah ku qabato, taas ayaa loo dhaariyay. Laakiin in qabaail isku yimaadaan oo arrinkaa ka wadahadlaan waa arrin qaribaya mustaqbalkii dawladnimo, waxaanan ka digayaa in qabiil lagu celiyo dilkii taliyihii booliska gobalka Saaxil bur-burkuna waxa uu ku yimaadaa qaabilka, dawlada waxa loo sameeyay in ummaddu ku kala bad-baado marka ay wax dhacaan dawlada ayaa wax ka qabanaysa, marka ay wax dhacaan ma aha in qabaail u kaco hebel ayaa la dilay waa xaaraan. qarankuna waa in uu sameeyo waajibka ka saaran nabadgelyada oo wixii khal-khalinaya gacan birr ah ku qabto.”
Dhinaca kale madaxweyne ku xigeenkii hore Axmed Yuusuf Yaasiin, waxa uu soo dhaweeyay qaabka ay diiwaangelinta codbixiyayaasu dalka uga socoto, waxaanu ugu baaqay dadweynaha gobalka Saaxil in ay ka qaybgalaan diiwaangelinta codbixiyayaasha ee toddobaadka dambe ka bilaamaysa gobalkaasi. “Diiwaangelintan socota, waxaan filayaa in ay aad u fiican tahay, oo ka fiican tahay tii hore ee la musuqay oo ah mid aan lagu cel-celin Karin. Waxaanan u soo jeedinayaa dadweynaha gobalka Saaxil in ay ka qaybgalaan diiwaangelintaasi socota”ayuu yidhi Axmed Yuusuf Yaasiin.
Ugu danbayn Axmed Yuusuf Yaasiin waxa uu ka hadlay arrinta kala xadaynta goboladda dalka, waxaanu sheegay in aanay ahayn mid ku salaysan qabaa’il kala xadaynta gobalada iyo degmooyinka dalku. Waxaanu yidhi “Xeerka kala xadaynta gobalada iyo degmooyinka dalka weli lama samayn, dadkuna qalad ayay ka fahamsan yihiin. Dadka aan u bayaamiyo waxa ay tahay kala xadaynta gobalada iyo degmooyinka iyo xuduudaha u dhaxeeya gobalada iyo degmooyinka, xuduuduna ma aha mid qabaa’il ee waa mid cashuur bixineed, waxan la kala xadaynayaa waa cashuuraha degmooyinku kala leeyihiin, ee ma aha qabiil baa meel laga qaaday, oo qabiil kale ayaa la siiyay, ayaan loo qaadanin kala xadaynta mid qabaa’il’.
Dawannews Hargeysa office
