Hargaysa (Dawan)- Wasiirka Wasaaradda Macdanta iyo Tamarta Somaliland Eng. Xuseen Cabdi Ducaale, ayaa beeniyay cabasho dhawaan ka soo yeedhay shirkadaha bixiya adeega korontadda oo la xidhiidhay in wasiirku uu waddo qorshe uu shirkad gaar ah kooto ugu xidhayo bixinta adeega korontadda.
Waxaanu ku dooday wasiirku in aanay jirin shirkad gaar ah oo ay wasaaradu saami ku leedahay, hase yeeshee arrinta ay ka dhalatay cabashadda ganacsatadda korontadu ay ka dhalatay wareegto ay wasaaradu ku amartay shirkadaha korontadda in la nidaamiyo aagga korontadda. Todobaadkii hore ayaa qaar ka mid ah shirkadaha bixiya adeega korontadda ee caasimadda Hargaysa iyo magaalooyinka kale ee dalkaa waxay golaha Wakiiladda u gudbiyeen cabasho ka dhan ah wasiirka wasaaradda macdanta iyo tamarta oo ay ku eedeeyeen in uu damacsan yahay qorshe uu shirkad gaar ah kooto ugu xidhayo bixinta adeega korontadda. Gudi hoosaadka dhaqaalaha ee golaha Wakiiladda Somaliland ayaa shalay waxay wasiirka macdanta iyo tamarta ka dhegaysteen warbixin ku saabsan waxa ka jira cabashadda ay u soo gudbiyeen shirkadaha korontadu, ee la xidhiidha in wasiirku uu shirkad gaar ah ku wareejinayo bixinta iyo ka ganacsiga adeegyadda korontadda. Kadib markii uu soo dhamaaday kulankaasi ayaa waxaa warbaahinta si wad ajir ah ula hadlay Xildhibaan Cali Maxamed Aadan (cali-bare), oo ka tirsan gudi hoosaadka dhaqaalaha ee golaha Wakiiladda iyo wasiirka macdanta.
Xildhibaan Cali-barre, oo ugu horayn waxa uu faahfaahin ka bixinayay kulankii ay wasiirka la yeesheen iyo qodobadii ay ka wada hadleen waxa uu yidhi “Wasiirka annaga ayaa u yeedhnay haddii aanu nahay guddi hoosaadka dhaqaalaha ee golaha wakiiladda, waxaananu ugu yeedhnay cabasho shirkaddo ka timid oo noo soo gudbiyay. Markii aanu iyagii dhegaysanay in aanu wasaaradiina dhegaysano waxa ay ka qabto waxa naloo sheegay iyo wixii ay hayaan ayaanu wasaaradana ugu yeedhnay. Wasiirka hadda (shalay) waanu waraysanay, labadii dhinacba waanu qaadnay waraysigoodii, haddii aanu cid kale u baahanana oo ay hawshu nala gasho waanu waydiinaynaa.”
Waxaanu intaasi ku daray “Ilaa hadda arrintu waxay noo maraysaa warbixinahaa aanu kala qaadanayno iyo macluumaadyadda (documents), wax kale oo natiijo ah ama hadda soo baxay oo diyaar ahi ma jiraan, marka waraysiyadu noo dhamaadaan, ee dhinac walba aanu hubino, qoraaladda iyo macluumaadka eegno, maslaxadda ummadda aanu eegno, markaas ayaanu gole ahaan ka soo saari doonaa natiijo,”ayuu yidhi xildhibaanku.Dhinaca kale wasiirka wasaaradda macdanta iyo tamarta wuxuu sheegay in uu gudiga dhaqaalaha ee Wakiiladda u cadeeyay in aanu jirin qorshe ay wasaaradu ku doonayso in bixinta adeega korontadda shirkad gaar ah kooto loogu xidho, hase yeeshee ay shirkadaha oo dhan wasaaradu u dirtay wareegto la doonayo in lagu nidaamiyo aagga korontadda inta uu soo baxayo xeerka hab-maamulka korontadda.Isagoo arrimahaasi ka hadlayay-na waxa uu yidhi “Cabashadda ay gudiga dhaqaalaha u soo gudbiyeen shirkadaha adeegyadda korontadu, ee ah in wasaaradda macdantu shirkad gaar ah u xidhay fidinta iyo ka ganacsiga adeega korontadda waanu uga waranay xildhibaanadda, waraaqihii cadaynta ahaa ee sheegayay in aanay jirin shirkad aanu si gaar ah kooto ugu xidhnay, balse waxay ahayd wareegto aanu u dirnay shirkadaha korontadda oo dhan oo aanu kula talinaynay inta sharcigu soo baxayo aynu nidaamino aagga korontadda, oo aynu ku soo dabaalno hageyaal caalami ah oo aanu doonayno in lagu meel-gaadho”.
“Masuuliyad ayaa naga saaran dalka, maadaama aanu nahay wasaaradii qaabilsanayd arrimahaasi in aanu kala-xadayn ku meel gaadh ah samayno, kala-xadayntaasina cid-na garabka saarimayso, cidna kama soo hor jeeddo. Wasaarad ahaan cidna saami kuma lihin, waxaanu qaabilsanahay oo ay muhiimadayadu tahay in ummadda Somaliland ay hesho adeeg koronto oo jaban, isla markaana bed-qaba. Ka ganacsiga adeegga korontadu ma aha badeecad la iibinayo, ama ma aha Bariis aad inna hebel ka soo iibsanayso” ayuu yidhi Eng. Ducaale.
Dawannews Hargeysa office