Nin u dhashay dalka Ukraine oo ka badbaaday xasuuqii Nazi-ga ee dagaalkii labaad ee aduunka ayaa lagu dilay weerar uu Ruushku ku qaaday bariga magaalada Kharkiv.
Boris Romantschenko, oo 96 jir ah, ayaa dhintay intii ay socotay duqeymaha Ruushka ee Jimcihii, sida ay sheegeen eheladiisa.
Ciidamada Ruushka ayaa si aan kala joogsi lahayn u duqeeyay magaalada Kharkiv, oo 30 mayl (50km) u jirta xadka, in ka badan saddex toddobaad. Ugu yaraan 500 oo rayid ah ayaa hadda lagu dilay halkaas, sida ay sheegeen saraakiisha Ukraine.
Booliska ayaa sheegay in mid ka mid ah dhibanayaasha la aqoonsaday inuu ahaa wiil sagaal jir ah.
Ururka Buchenwald iyo Mittelbau-Dora Memorials Foundation ayaa sheegay in ay “aad uga xumaadeen” geerida Mr Romantschenko.
Ururka oo uu Mr Romantschenko ka ahaa madaxweyne ku xigeenka ayaa warkan ku dhawaaqay ka dib markii ay ku wargeliyeen qoyskiisa wuxuuna sheegay in uu “si adag uga shaqeeyay xusuusta dembiyadii Nazi-ga”.
“Waxaan u baroor diiqaynaa geerida saaxiib dhow, waxaan u rajeyneynaa wiilkiisa iyo in uu awoowe u yahay, oo noo keenay warka murugada leh, dhiiri gelin badan oo ay kaga baxaan xilliyadan adag,” ayaa lagu daray bayaanka mu’asasada.
Mr Romantschenko waxa uu ku dhashay magaalada Bondari ee waqooyi bari 20kii January 1926kii.
Waxa uu ka mid ahaa dadkii Yuhuuda ee ciidamadii Nazi-gu soo ururiyeen kadib duulaankii Midowga Soofiyeeti, waxaana loo qaaday Jarmalka 1942-kii, halkaas oo lagu qasbay inuu qabto shaqo adag, sida ay tidhi Mittelbau-Dora Memorials Foundation.
Markii uu ku guuldaraystay isku day baxsad sanadkii 1943-kii, waxaa loo diray xerada Buchenwald oo ahayd mid aad loo ilaaliyo oo la geeyo dadka loo fiirsanayo, halkaas oo ilaa 56,545 qof lagu dilay ka hor intii aanay xorayn xulafadii sbahaysiga reer galbeedka 1945.
Waxa uu sidoo kale waqti ku qaatay kaamka hoose ee Mittelbau-Dora, iyo sidoo kale xerooyinka caanka ah ee Bergen Belsen iyo Peenemünde.
Waxa uu ku soo laabtay Buchenwald 2012 si uu ugu dabaaldego sannad-guuradii 67-aad ee ka soo wareegtay markii ay ciidamada Maraykanku ka xoreeyeen xerada, halkaas oo uu ka akhriyey ballanqaadkii ay sameeyeen kuwa badbaaday si ay u abuuraan “adduunyo cusub oo nabadda iyo xorriyadda ay xukumayaan”.
Taliskii Naasigu wuxuu dilay in ka badan lix milyan oo Yuhuudi ah, wuxuuna dadkaa laayey intii uu Yurub qabsaday intii u dhaxaysay 1941 iyo 1945.