Wasiirka gaadiidka ee dalka Koonfur Afrika ayaa ka warbixisay qaabkii loogu dhacay qori caaradii ka dib markii gaadhigii ay wadatay uu ku istaagay wado weyn si ay u bedesho taayir ka qarxay.
Sindisiwe Chikunga ayaa guddi baarlamaanka ka tirsan uga warbixisay in mid ka mid ah kooxihii wejiga soo duubtay uu qori madaxa kaga dhuftay intii ay dhibaatadu socotay subaxnimadii Isniinta.
Waxay xadeen qaar ka mid ah laptops, telefoon iyo hubkii ilaaladeeda, ayay tidhi.
Koonfur Afrika ayaa in muddo ahba wajaheysay heerar dambiyeedyo aad u sarreeya, oo ay ka mid yihiin afduubka baabuurta, afduubka iyo dhaca jabiska guryaha.
Balse waa wax aan caadi ahayn in wasiir ka tirsan dowladda oo la soctay ilaalo hubeysan lagu dhaco gaadhigooda.
“Qayb dhaca ka mid ah ayey ahayd, laakiin waxay ahayd waayo-aragnimada naxdin leh,” Ms Chikunga ayaa u sheegtay mudanayaasha.
Waxay sheegtay in 03:30 wakhtiga maxaliga ah ee isniinta ilaaladeeda – ama “ilaaliye” – ay ka soo degeen gaadhiga, oo ku socdaalayay wadada wayn ee koonfurta Johannesburg, si ay u bedelaan taayir qarxay.
Markaas ayay tuugadii u soo dhawaadeen, iyaga oo ku khasbay ilaaladii in ay hubka dhigaan oo dhulka jiifsadaan, ka dibna ay fureen albaabka gaadhiga.
Waxay “bastoolad ayey madaxa iga saareen waxayna igu amreen inaan soo baxo”, ayay tidhi Ms Chikunga.
Waxay dalbadeen lacag, laakiin waxay sharraxday in aanay wax lacag ah hayn. Ka dib waxa ay baadheen gaadhigii iyaga oo qaadanaya wixii ay heli kareen.
Tuugtii oo wali ruxaysa qoryihii ay wateen ayay sidoo kale damceen in ay ka qaataan far-galkii wasiirka balse waxa ay ku tidhi “Kani waa waxa kaliya ee naga dhexeeya aniga iyo ninkaygii dhintay iyo nafteyda, aad ayaan u qiimeeyaa”.
Booliska ayaa xaqiijiyay in dhacu uu dhacay “waxaana la bilaabay ugaadhsi ka dib dhacdadan aan hore loo arag”, sida ay ku warantay wakaalada wararka ee AFP.
Sahankii ugu dambeeyay ee sanadlaha ah ku dhawaad 1.3 milyan oo qof ayaa sheegay in ay ahaayeen dhibanayaal dambiyo hantiyeed.