Madaxweynaha Senegal Bassirou Diomaye Faye ayaa xilka ka qaaday Ra’iisul Wasaare Ousmane Sonko, wuxuuna kala diray dowladdii qaranka ka dib bilo xiisad ah oo u dhaxaysay labada nin.
Wareegto lama filaan ah, oo uu TV-ga ka akhriyay kaaliye madaxweyne, ayaa lagu sheegay in Faye uu “joojiyay waajibaadkii” saaxiibkiisii hore ee siyaasadda Sonko iyo “sidaas darteedna ay wasiirradiisii iyo xoghayayaasha dowladda ee xubnaha ka ah dowladdiisa aanay shaqaynayn”.
Sonko, oo ah shakhsi caan ka ah dhalinyarada Senegal, ayaa baraha bulshada ka sheegay inuu “ku seexan doono qalbi qabow”.
Kala qaybsanaantan ayaa timid iyada oo dalka uu wajahayo cadaadis dhaqaale oo sii kordhaya, iyada oo deynta dadweynaha ay gaadhay 132% GDP-giisa, sida laga soo xigtay Hay’adda Lacagta Adduunka (IMF).
Xil ka qaadista Sonko ayaa ka dambeysay fadhigii baarlamaanka ee Salaasadii, kaas oo ra’iisul wasaaruhu si cad ugu dhaleeceeyay Faye qaabka uu u wajahay dhibaatada deynta.
Si kastaba ha ahaatee, Sonko wuxuu taageeray isku dayga Faye ee madaxweynenimada, isaga oo adeegsanaya halkudhegga ah “Diomaye waa Sonko, Sonko waa Diomaye”.
Labada nin ayaa xilka ka qaaday madaxweynihii xilligaas Macky Sall – guul aan caadi ahayn maadaama ay labaduba xabsiga ku jireen ilaa 10 maalmood ka hor doorashada .
Habeenkii Salaasadii markii warka la maqlay, dhowr boqol oo arday ayaa dibadbax ka dhigay waddooyinka caasimadda, Dakar, iyaga oo ku dhawaaqaya taageerada ay u hayaan Sonko.
Ma jirto faahfaahin laga bixiyay magacaabista ra’iisul wasaare cusub.
Xiisadda u dhaxaysa Sonko iyo Faye ayaa soo ifbaxday bilo badan.
Faye ayaa la sheegay inuu dhaleeceeyay “shaqsiyad-siinta xad-dhaafka ah” ee Sonko uu ku sameeyay xisbiga talada haya ee Pastef, halka Sonko uu madaxweynaha ku eedeeyay “ku guuldarreysiga hoggaanka” isaga oo aan ka difaacin dhaleeceyntiisa.
Iyada oo ay jirto xiisaddan, hoggaamiyeyaasha Senegal waxay la tacaalayeen deynta baaxadda leh ee ay ka dhaxleen dowladdii hore.
IMF ayaa joojisay barnaamijkeedii amaahda ahaa ee $1.8 bilyan (£1.3 bilyan) ee ay la lahayd Senegal.