Suuriya iyo Ruushka ayaa 18-kii bilood ee la soo dhaafay ku qaatay wadahadallo ku saabsan masiirka joogitaanka militariga Moscow ee Suuriya ka dib markii la riday nidaamkii Bashar al-Assad bishii Diseembar 2024. Axaddii, ugu yaraan qayb ka mid ah su’aashaas waxay u muuqatay in la xalliyay ka dib markii dowladdii ka dambeysay Assad ee Dimishiq ay ku dhawaaqday heshiis is-afgarad ah oo ku saabsan saldhigga cirka ee Hmeimim ee Moscow iyo saldhigga ciidamada badda ee Tartus.
Ruushka wuxuu ahaa xulafo weyn oo Assad ah intii lagu jiray dagaalkii sokeeye ee Suuriya oo socday ku dhawaad 14 sano, kaas oo ka bilaabmay dibadbaxyadii Gu’ga Carabta sanadkii 2011, wuxuuna dhammaaday markii Madaxweynaha hadda, Axmed Al-Sharaa, uu weerar hillaac ah ku qaaday Dimishiq, uuna xukunka ka tuuray Assad oo u cararay Ruushka halkaas oo isaga iyo qoyskiisa laga siiyay magangalyo.
Heshiiska cusub, Suuriya waxay la wareegi doontaa xarumaha rayidka ee ku yaal saldhigga cirka ee Hmeimim iyo qaybta ganacsiga ee dekedda Tartus. Xarumaha militariga waxaa loo beddeli doonaa xarumo tababar iyo shahaadooyin oo wadajir ah oo ay leeyihiin Ruushka iyo Suuriya, iyada oo la filayo in kala-guurka la dhammeeyo saddex bilood gudahood. Moscow weli kama aanay hadlin heshiiska. Waxay calaamad u tahay isbeddel muhiim ah oo ka yimid doorkii labada saldhig ay mar ku lahaayeen u adeegidda al-Assad intii lagu jiray dagaalkii sokeeye kaas oo dilay boqolaal kun oo Suuriyaan ah isla markaana barakiciyay malaayiin.
Si kastaba ha ahaatee, falanqeeyayaashu waxay leeyihiin waxay matali kartaa wax ka macquulsan, iyada oo Dimishiq ay dib u soo ceshanayso madaxbannaani weyn oo ka sarreysa xarumaha muhiimka ah ee istaraatiijiga ah, halka Moscow ay ilaalinayso booskeeda oo ay ka fogaanayso in gebi ahaanba laga saaro waddan ay si weyn u maalgelisay tobanaan sano.
“Heshiiska dhex maray Ruushka iyo dowladda Suuriya wuxuu muujinayaa in labada dal ay isu baahan yihiin,” Alexey Muraviev, oo ah cilmi-baadhe sare oo ku takhasusay difaaca iyo daraasaadka istaraatiijiyadda ee Jaamacadda Edith Cowan ee Galbeedka Australia, ayaa u sheegay Al Jazeera, isaga oo intaa ku daray in Damascus ay u badan tahay in aanay “xiiseyneynin inay joojiso xidhiidhkeeda dheer ee ay la leedahay Ruushka”.
In kasta oo ay Moscow ka qayb qaadatay dagaalkii Assad lagu difaacayey
Muu fara gelin intii uu Axmed Cashara uu Dimishiq ku waday dagaalkii hilaaca ahaa kaas oo horseeday in Al-Assad xukunka laga tuuro bishii Diseembar 2024. Sidaas oo kale Ruushku wuu ka gaabsaday Suuriya markii Assad laga eryey.
Sidaas oo kale, ciidamada Ruushka ee weli ku sugan Suuriya ayaa si tartiib tartiib ah uga baxay dalka marka laga reebo kuwa ku sugnaa labada saldhig. Wasaaradda arrimaha dibadda ee Suuriya ayaa bayaan ay soo saartay ku sheegtay in qabanqaabada cusub ee saldhigyadan ay ka dhigan tahay “dib-u-habayn lagu sameynayo joogitaanka Ruushka” ee xeebaha Suuriya.
.