Badaha adduunka ayaa gaadhay heerkii ugu kululaa abid ee la diiwaan geliyo bishii July ee la soo dhaafay, taas oo qayb ahaan ay sabab u tahay korodhka xaaladaha El Niño ee Baasifigga , sida laga soo xigtay adeegga la socodka cimilada ee Midowga Yurub. Celceliska heerkulka dusha sare ee badda (SST) ee ka baxsan gobollada cidhifka adduunka – inta u dhaxaysa 60 darajo waqooyi iyo 60 darajo koonfur – wuxuu ahaa 20.96C bishii hore, isaga oo ka sarreeya heerkii ugu sarreeyay ee 20.89C, kaa oo la dejiyay 2023.
Bishii hore waxay ahayd bishii labaad ee ugu kululayd adduunka oo dhan bishii July, iyada oo heerkulku uu ahaa 1.47C oo ka sarreeya celceliska la qiyaasay ka hor warshadaha, sida laga soo xigtay Adeegga Isbeddelka Cimilada ee Copernicus. Dhanka kale, Galbeedka Yurub wuxuu la kulmay kulaylkii ugu kululaa abid Jume iyo July, iyada oo xaalado kulul iyo qalalan oo daba dheeraaday ay sii hurinayaan dabka kaymaha ee aad u daran oo ka dhacay gobolka Galbeedka Yurub oo dhan.
Yurub dhexdeeda, heerkulka dusha sare ee badda bishii Luulyo wuxuu gaadhay heerkii ugu sarreeyay ee xeebta Atlaantik iyo galbeedka Mediterranean-ka, taas oo gacan ka geysatay kulaylka badda oo baahsan oo xooggan oo daran. Heerkulka baddu wuxuu ahaa mid aad u sarreeya inta badan dhulalka kulaylaha ee Baasifigga, halkaas oo xaaladaha El Niño ay ka soo ifbaxayaan lana saadaalinayo inay sii xoogaysan doonaan bilaha soo socda.
El Niño waa cimilo dabiici ah oo ka jirta Baasifigga oo ay weheliso kulaylka caalamiga ah ee uu bini’aadamku sameeyo, taas oo sababi karta kor u kaca heerkulka iyo cimilo aad u daran. Baddu waa hay’ad muhiim u ah cimilada, waxayna nuugtaa inta badan kulaylka xad-dhaafka ah ee ka dhasha qiiqa gaaska aqalka loo yaqaan Green house, waxaana badduhu soo saaraan kala badh oksijiinta Dhulka.
Saamaynta ugu weyn ee kululaynta badweyntu waa kor u kaca heerka badda. Marka biyaha badweyntu diirimaadaan way sii fidaan, ballaadhintan kulaylkana waxay ka dhigan tahay qiyaastii saddex meelood meel kor u kaca heerka badda oo ay diiwaangeliyeen saynisyahannadu ilaa hadda. Biyahaasi waxay ku soo duulaan xeebaha hoose iyo waddamada jasiiradaha. Baddaha kulul ayaa sidoo kale sii wada hirarka kulaylka badda oo aad u dheer oo aad u daran.