Dadka Israa’iil ayaa shalay Salaasadii u dareeray si ay codkooda u dhiibtaan doorashada baarlamaanka, iyada oo uu Rai’sal wasaare Benjamin Netanyahu, uu doonayo in uu noqdo masuulkii wakhtiga ugu dheer talada hayay.
Malaayiin Israeliyiin ah ayaa ka codeynaya doorashadan oo lagu wado in ay tahay tartankii isugu dhawaa ee xisbiga Benjamin Netanyahu iyo isbaheysiga bidix dhexe.
Isbahaysiga midowga bidix dhexe ee zahyuuniyiinta ayaa ballanqaadaya in ay dib u hagaajinayaan xidhiidhka Falastiiniyiinta iyo beesha caalamka.
Haseyeeshee Raisal wasaaraha Israa’iil Benjamin Netanyahu, ayaa isagu sheegay in inta uu xilka hayo aaney dal yeelan doonin Falastiin, hadalkaas oo uu ku soo beegay doorashada guud.
Waxa uuna isku dayayaa in uu kor u qaado taageerada xisbigiisa Likud, kaas oo ka dambeeya ama ka hooseeya xisbiga isbahaysiga bidix dhexe sida ay muujinayso ra’yi uruurintii u dambaysay ee la sameeyay.
