Hargaysa (Dawan):- Guddoomiyaha xisbiga mucaaridka ah ee UCID Eng. Faysal Cali Waraabe, ayaa naqdiyay hawlaha shaqo ee golaha Wakiiladda Somaliland iyo sidoo kale goleyaasha degaanka ee dalka.
Guddoomiyuhu waxa uu sheegay in Golihii hore ee Wakiiladda ay ka tayo fiicnaayeen kuwan haddaa jooga.
Eng. Faysal Cali Waraabe oo shalay hadal ka jeediyay kulan lagaga hadlayay doorashooyinka iyo diiwaan-gelinta ayaa tilmaamay in faraq weyni u dhexeeyo goleyaashii hore ee degaamadda iyo wakiiladda ee dalka soo maray,waxaanu yidhi “Annigoo ka mid ah dadkii bilaabay 2001 ururrada siyaasadda dad badan ayaa ii yimid oo yidhi naga jooji aniguna waxaan arkayay inay yimaadeen laba dawladood oo qabaa’il ku dhisan markaa ay qasab ahayd in laga baxo haddii aynu dib u eegno golihii Wakiiladda ee 2005 iyo golaha Wakiiladda ee maanta, waxaa qurux badnaa kuwii 2005.Haddii aynu eegno golaha degaanka ee 2002 iyo kuwaynu dooranay 2012 kuwii hore ayaa ku qurux badnaa markaa waxa aynu nahay ummad aan hore u wadin waxay samayso.”
Eng. Faysal Cali Waraabe waxa uu sheegay in aan loo baahnayn in beelaha la tartan siiyo waxaanu yidhi “Wax kasta haddii aynu ku eegno muraayad qabiil oo qabiilka la tartan siiyo, oo siyaasiyiintu tartan siiyaan ama dhaqanku, wixii way fool xumaanayaan.”
Dawannews Hargeysa office
