Hargeysa (Dawan)- Maxkamadda Gobolka Hargaysa, ayaa shalay markii labaad dhegaysatay kiiska dacwada loo haysto xubno ka tirsan xisbiga mucaaradka ah ee Waddani, oo kala ah guddoomiyihii garabka dhallinyarada ee xisbigaasi Maxamed Sidiiq Dhamme iyo Xoghayaha ciyaaraha ee xisbigaas Yoonis Axmed Yoonis. Kiiskan, waxa ka garnaqaya Garsoore la yidhaahdo Idiris Maxamed Muxumed oo ka mid ah xukaamta maxkamadda Maroodi-jeex.
Fadhigan maxkamadda gobalka Hargaysa wuxuu ahaa mid furan, waxaanay maxkamaddu dhegaysatay maragyada kiiskan iyo xeer ilaalinta oo dacawada ku soo oogtay dacwaysaneyaasha iyo difaaca qareennada u doodaya eedaysanayaashan, waxaa maxkamadu wax ka waydiisay Guddoomiyaha degmada 26 Juun iyo agaasimaha hay’adda dabdamiska, waddo banayn ay dawladda hoose ee Hargaysa samaysay dhawaan oo xubnahan lagu eedeeyay inay ishortageen hawlgalkii dawladda hoose.
Guddoomiyeha degamada 26-ka June ee magaalada Hargeysa ayaa maxkamadda horteeda ka caddeeyay in hay’adda dabdamisku ay ka dalbatay dawladda hoose ee Hargeysa in la baneeyo waddada Xarunta hay’adda dabdamiska kaga beegan xaga bari, waxaanu xusay in ay dumiyeen dayrar waddada soo galay.
Sidoo kale waxa maxkamaddu dhagaysatay dambi baadhihii kiiskan gacanta ku hayay oo ka socday ciidammada Booliska oo xusay in lagu soo eedeeyay dacwaysanaashan in ay ku kaceen falal kicin ah iyo been abuur ay ka sameeyaan ciidammada booliska, oo mid ka mid ah eedaysanayaashu bartiisa facebook ku faafiyay in ciidanka ammaanku ay ku milmeen siyaasadda, isla markaana la ay safteen xisbiga Kulmiye. Waxa kaloo dambi baadhuhu sheegay in guddoomiyaha garabka dhallinyarada ee xisbiga Waddani uu qirtay in facebookgiisa uu ku faafiyay sawir lagu sheegayo in ciidammada ku milmeen xisbiga Kulmiye.
Dambi baadhaha oo la waydiiyay inay jirtay cid ku soo farogalisay kiiskan, waxa u ku dooday ayaa in aanay jirin cid ku soo faro galisay kiiskan.
Waxa kaloo maragyadii kiiskani fadhigaas ka sheegeen in labadadan masuul ee ka tirsan xisbiga Waddani ay aflagaadeeyeen ciidammada booliska oo ay ku tilmaameen in ay yihiin gacmihii dulmiga oo ciddi ku adeeganayso. Hase yeeshee qareennada u doodaya eedaysaneyaashan ayaa su’aalo kala duwan weydiiyay dambi-baadhaha iyo maragyadii xeer ilaalintu keentay.
Dhagaysiga dacwadan ayaa waxa ka qaybgalay afar qareen oo u doodaya eedaysaneyaasha, xeer ilaalinta gobolka Maroodi-jeex, Murrashaxa madaxweynaha ee Waddani, Cabdraxmaan Maxamed Cabdilaahi Cabdiraxmaan, (Cirro), Guddoomiyaha ku meel gaadhka ah ee xisbigaas Cabdiqaadir Xaaji Ismaaciil Jirde, siyaasiyiin mucaarid ah iyo dadweyne kaleba.
Maxkamadu waxay u muddaysan inay dhegaysato fadhigii saddexaad ee dacwadan Axadda fooda innagu soo haysa.
Dawannews Hargeysa office