Berbera (Dawan)- Toban askari oo ka tirsani Ciidanka Booliska,ayaa dhaawacyo kala duwani ka soo gaadheen hawlgal ay shalay ka fuliyeen magaalada Berbera, kaasi oo ay ku duminayeen dhisme la sheegay inuuu sifo sharci darro ah ku dhisanayay nin la yidhaahdo Faysal Axmed Maygaag (Wadka). Ka dib markii Guddoomiyaha Gobolka Saaxil amar ku bixiyay in la joojiyo dhismahaas.
Taliyaha ciidanka Booliska gobolka Saaxil Ganshaale dhexe, Aadan Cabdi Cawaale (Qushi), ayaa ka hadlay hawlgalkaas iyo iska caabbin ay kala kulmeen ninkii dhismahaas dhisanayay oo rasaas kala hor yimmid ciidanka Booliska. “Halkan maanta (shalay) waxaa ka jirtay hawlgal D/Hoose ay ku burburinaysay dhul uu nin Faysl la yidhaahda ku dhisanaayey sharci darro , ka dib markii ciidanku yimid goobta waxa uu lasoo baxay qori oo rasaas ayuu ku riday ciidanka dadkiinna dhagaxaan ayay dhulka u taabteen. Ciidanka waxa uu dhaawac ka soo gaadhay Illaa toban askari , waxaan qabanay toban qof oo shacab ah oo hada xabsiga ku jira, nasiib darro waxaa naga baxsaday ninkii laakiin gacanta ayaan kusoo dhigaynaa haddii ALLe yidhaahdo,”ayuu yidhi Taliyuhu.
Waxa kaloo Taliyuhu intaas ku daray; “Hawsha waanu wadanayaa marka aanu dhammaystirno waxaan ka hawlgalanaynaa ninkaa ciidanka booliksa rasaaseeyey sidii aanu ku soo qaban lahayn.”
Dawannews Hargeysa office