Hargaysa (Dawan)- Wasiirka Wasaaradda Warfaafinta iyo Wacyigelinta Jamhuuriyadda Somaliland, Md. Cismaan C/laahi Saxardiid (Caddaani), ayaa dalka ku soo dhaweeyay madaxa qaybta Afrika ee idaacadda caalamiga ah radio France 24 oo laga leeyahay dalka Faransiiska.
U jeeddada safarka ay Hargaysa ku yimaadeen xubnahan ka socday Radio France 24 ayaa la sheegay in ay la xidhiidhi iyagoo doonaya in ay Somaliland ka furtaan idaacad ku hadasha luuqadda Faransiiska.
France 24 oo xaruntiisa dhexe ku taallo dalka Faransiiska ayaa xarumo ku leh 37 wadan oo ku yaalla qaaradda Afrika. Weftigan ka socday France 24 ayaa soo kormeeray qaybaha kala duwan ee wasaaradda warfaafinta Somaliland sida TV-ga radio Hargaysa iyo wakaaladda wararka qaranka ee SOLNA. Wasiirka Warfaafinta Somaliland iyo xubnahan ka socday radiyaha France 24 oo kadib markii ay kormeerkaasi soo dhamaysteen si wada jir ah shir jaraa’id ugu qabtay xarunta wasaaradda warfaafinta ee magaaladda Hargaysa, ayaa faahfaahin ka bixiyay u jeedadda socdaalka ay Somaliland ku yimaadeen.
Cismaan C/laahi Saxardiid (cadaani), oo ugu horayn halkaasi ka hadlay waxa uu yidhi “Waxaa maanta (shalay) halkan nala jooga oo booqasho noogu yimid ninka madaxda ka ah radio France 24, oo aanu muddo ka wada hadlaynay sidii ay Somaliland uga furan lahaayeen qayb ku hadla luuqadda Faransiiska.
Waa markii u horaysay ee ay Somaliland yimaadaan madaxda radio France 24 ee Afrika iyo xubnahan la socdaaba, waxaanan filayaa in ay si dhakhso ah Somaliland uga furtaan waaxdaasi. Xidhiidh wanaagsan in aan la yeelano ayaan doonaynaa Faransiiska”.
Waxa kale oo uu sheegay wasiirka warfaafinta Somaliland in ay rejaynayaan in dhawaan ay dalka iman doonaan koox kale oo ka socda radio France 24, isla markaana ay kala saxeexan doonaan qandaraaska la xidhiidha in ay Hargaysa ka furtaan xarun.
“Waxaan rejaynaynaa in ay dhawaan Somaliland iman doonaan koox kale oo ka socda radio France 24, oo aanu wada saxeexan doonno qandaraaska la xidhiidha in ay Hargaysa ka furtaan idaacad ku hadasha luuqadda Faransiiska.
Runtii waan ku faraxsanahay in ay Somaliland yimaadaan kooxdan ka socda radio France 24, oo ay xarun ku yeeshaan Somaliland. Xagga radio-ga oo qudha maahee, waxaanu doonaynaa oo kale in TV-ga caalamiga ah ee France 24 isna xarun ka samaysto Somaliland.
Radio-ga France 24, wuxuu xarumo ku leeyahay 37 dal oo Afrika ku yaalla. Innagu-na waxaan rejaynaynaa in aan noqo wadankii 38-aad” ayuu yidhi wasiir Cadaani.
Wasiir Cadaani, ayaa sidoo kale u mahad celiyay Dr. Edna Aadan Ismaaciil, oo ka soo shaqaysay safarka ay Somaliland ku yimaadeen xubnahan ka socday France 24. Waxaanu yidhi “Arrintani may dhacdeen haddii aanay marwo Edna Aadan Ismaaciil, kula kulmin dalka Faransiiska, runtii aad iyo aad ayaan ugu mahad naqayaa Adna”.
Geesta kale madaxa qaybta Afrika ee idaacadda France 24, oo isna halkaasi ka hadlay ayaa wasiirka uga mahad celiyay sida wanaagsan ee uu dalka ugu soo dhaweeyay Somaliland, isagoo xusay in ay tahay markii u horaysay ee uu yimaado Somaliland.
Waxaanu yidhi “Marka hore waxaan u mahad naqayaa sida wanaagsan ee uu noo soo dhaweeyay wasiirka warfaafinta iyo wacyigeinta Somaliland. Waa markii u horaysay oo aan safar ku imaaddo Somaliland, intii aan joogayna waxaan la kulmay dad kala duwan.”
Dawannews Hargeysa office