India(Dawan)- Alle ha u naxariistee Xildhibaan Marxuum-Cabdiraxmaan Maxamed Talyanle, oo ka mid ahaa xildhibaannada Golaha Wakiillada Jamhuuriyadda Somaliland ayaa xalay ku geeriyooday cusbitaal ku yaalla waddanka Hindiya oo uu xaalad caafimaad ugu maqnaa maalmihii u dambeeyay.
Alle ha u naxariistee Marxuum- Cabdiraxmaan Talyanle waxa laga soo doortay gobolka Sanaag, waxaanu ka mid ahaa siyaasiyiintii kaalinta weyn ka soo qaatay nabadeyntii iyo dawlad dhiskii Somaliland.
Marxuum-Cabdiraxmaan Talyanle wuxuu ahaa siyaasi kalsooni iyo hal-adayg ku sifoobay, wuxuu dalka ka soo qabtay xilka maareeyihii madbacada qaranka xilligii Marxuum-Cigaal. Waxa kaloo uu noqday guddoomiye ku-xigeenka labaad ee xisbal xaakimka KULMIYE.
Marxuumku wuxuu xiligan ka tirsanaa xisbiga mucaaridka ah ee WADDANI, waxaanu 6dii Ogos ee la soo dhaafay u tartamay xilka guddoomiyaha golaha wakiillada, oo Guddoomiye Baashe Maxamed Faarax kaga guulaystay hal cod kadib markii ay kala heleen 38 iyo 39 cod.
Dawannews Hargeysa office