Kooxda kubadda cagta Chelsea ayaa dariskeeda Arsenal kasoo xoogtay mid ka mid ah ciyaartoyda mustaqbalka weyn leh ee ku jiray kulliyadda da’yarta Gunners, kaas oo hadda kasoo degaya Stamford Bridge, waxaanu ku biiri doonaa liiska ciyaartoyda ay labada kooxood ee xafiiltanka magaalaysani ka dhexeeyo ay la kala wareegeen.
Chelsea ayaa hore u shaacisay inay heshiis buuxa la gashay xiddiga da’da yar ee lagu tilmaamo kuwa ugu fiican ee waqtigan kasoo baxaya kulliyadaha da’yarta, kaas oo muddo kooban lagu carbin doono Cobham ka hor inta aan loosoo dallacsiinin kooxda koowaad amaba aan lagu dirin amaah.
Kaddib markii ay laacibkan gacanta ku dhigeen, Thomas Tuchel iyo shaqaalaha iibka ayaa u jeedsaday dhinaca Arsenal oo ay kala soo wareegayaan da’yar kale oo cajiib ah oo hadda shaacintiisa oo kali ahi hadhsan tahay.
Laacibkan oo lagu magacaabo Omari Hutchinson ayaa la sheegay in Chelsea ay heshiis buuxa la gaadhay, iyadoo waliba si xor ah ay kagala soo wareegayaan Arsenal.
Wariyaha ciyaaraha ee Fabrizio Romano ayaa xaqiijiyey, in Omari Hutchingson uu saacadaha soo socda noqon doono ciyaartoy ka tirsan Chelsea oo uu tegi doono kulliyadda Blues, waxaana la rumaysan yahay in aanay waqti badan ku qaadan doonin inuu usoo dallaco heerka koowaad.
Arsenal ayaa dedaal badan ku bixisay sidii ay ugu qancin lahayd in uu heshiis cusub u saxeexo Omari Hutchinson, hase yeeshee da’yarkan ayaa go’aansaday in aanu heshiiska u kordhin oo uu iskaga tago Gunners.
Wada-hadallo muddo u socday wakiilka ciyaartoygan iyo Arsenal ayaa burburay, waxaanay taasi keentay in uu si xor ah ugu biiray Hutchinson.
