Halyeeygii hore ee Manchester United, Peter Schmeichel, ayaa ku tilmaamay goolhayaha Arsenal, David Raya, ciyaaryahanka horumarka ugu badan ku tallaabsaday Premier League waqtigan.
Schmeichel ayaa arrintan sheegay kadib markii Arsenal 2-1 kaga adkaatay Chelsea kulan ka tirsanaa London derby.
Raya ayaa si rasmi ah ugu biiray Arsenal sanadkii 2024 kadib markii uu markii hore amaah kaga yimid Brentford, isagoo si buuxda u qabsaday booska koowaad ee goolhayaha.
“Ma fahmin markii Raya laga keenay Brentford si uu ugu biiro Arsenal, sababtoo ah waxay haysteen Aaron Ramsdale oo si fiican u ciyaarayay,” ayuu Schmeichel u sheegay Viaplay.
“Waan dhaleeceeyay waqtigaas, ma yeelan kartid labo goolhaye oo number one ah; waa inaad mid doorataa. Maxaad Raya u keenaysaan?”
Si kastaba, Schmeichel ayaa hadda qiray: “Waxaan u maleynayaa inuu yahay ciyaaryahanka ugu horumarka badan Premier League saddexdii xilli ciyaareed ee ugu dambeeyay.”