Hargaysa (Dawan): Madaxweyne ku xigeenka Somaliland Md. C/raxmaan C/laahi Ismaaciil (Saylici), ayaa been cad oo aan sal iyo raadtoona lahayn ku tilmaamay war ay qoreen qaar ka mid ah warbaahinta dalka, kaas oo ay ku sheegeen in madaxweyne Siilaanyo ka tanaasulay murashaxnimadda madaxweyne-nimadda ee doorashadda soo socota.
waxaanu sheegay in xisbiga Kulmiye ay ka sharaxan yihiin madaxweyne Axmed Maxamed Maxamuud (Siilaanyo) iyo isaga oo ah madaxweyne ku xigeenkiisa C/raxmaan C/laahi Ismaaciil (Saylici), isaga oo ugu baaqay bulshadda reer Somaliland in aanay dheg u dhigin wararka been abuurka ee khal-khal lagu galinayo dalka.
C/raxmaan Saylici, waxa uu sidaasi ka sheegay hadal uu shalay ka jeediyay munaasibad shahaadoyin lagu gudoonsiinayay 134 Arday oo ka qalan-jabiyay machadka shaqaalaha dawladda ee CSI, oo lagu qabtay Huteelka Maansoor ee magaaladda Hargeysa.
isagoo ka hadlayay arrinta ay dhawaan warbaahintu qortay, waxa uu yidhi “Maalin dhawayd waxa lagu qoray jaraa’idka madaxweynaha oo ka tanaasulay murashaxnimadii, warkaasi warar sal iyo raad toona leh ma aha. Axmed Maxamed Maxamuud (Siilaanyo) waa musharaxa madaxweynaha iyo madaxweyne ku xigeenka oo aniga ah ayaa xisbiga Kulmiye u sharaxan. sida sharciga iyo dastuurka dalku siinayo in mar labaad uu is-sharixi karo, dadka ayaanay u taalaa inay noogu celiyaan, laakiin musharixiintu waa Axmed Maxamed Maxamuud (Siilaanyo) iyo C/raxmaan C/laahi Ismaaciil (Saylici).
“Umadda reer Somaliland, waxaan leeyahay ayaan khal-khal la idinku gelinin dadka iyo dalkana la jahawareerin, ruug cadaagii ina hogaaminayay ayaa maantana musharax ah, dadweynaha ayaanay u taalaa maalinta doorashadda loo dareero, waxa aanu qabanayna ku faani mayno indhaha ayaana macalin ah. waxaan se leeyahay dhaleecaynta halanaga sheego, Ribadu waa xaaraan, wixii naga khaldamay in lagu toosiyo waan ogol nahay, laakiin wax aanaan lahayn ninka odhanaya dalkaa dhan ee dhismay dawladani waxba ma qaban waa nasiib daro, afar sano waxaa is-bedelay waa la arkayaa in waddo la dhisay, in wasaaraddo la dhisay, aduunyadana lama arag miisaaniyad ka bilaamatay 50 bilyan oo maantana 189 milyan maraysa, oo is-bedela inta xun a yaan la eegin ee inta wanaagsana hala arko” ayuu yidhi C/raxmaan Saylici.
Madaxweyne ku xigeenka ayaa u soo jeediyay xisbiyadda mucaaridka ah inay ka waantoobaan ka hadalka arrimaha ciidamada qalabka sida oo uu ku tilmaamay inay yihiin lama taabtaan. waxaanu yidhi “Waxaan leeyahay mucaaridadu inay xaragada ka tagaan ma aha, haddii ay xildhibaan tahay iyo haddii ay nin kale oo mucaarid ah tahay ba ayaanay ciidamadda dhex-gelin, arrinta ciidamadda oo lama taabtaan ah oo inaga dhaxaysa, mucaaridkuna waxa uu rabaa inuu mar uun dalka xukumo, dalka ay doonayaan in ay xukumaana in uu sii dumiyo looma baahna, oo ciidamada uu dhex-galo. taa cidna laga yeeli maayo, waxaan leeyahay ha laga feejignaado.”
Sidoo kale C/raxmaan Saylici waxa uu ku naqdiyay xisbiyadda mucaaridka ah eedaymaha aan jihadda lahayn ee ay u soo jeediyaan xukuumadda iyo qabyaalad, taasi oo uu sheegay in ay tahay mid ay dalka wax ugu dhimayaan.
Waxaanu tilmaamay in aanay xukuumad ahaan diidanayn dhaliilaha toosinta ah ee ay mucaaridku u soo jeediyaan xiliyadda ay munaasibka tahay, hase yeeshee in maalin kasta ay mucaaridku ku hadlaan waxyaabo aan loo baahnayn ay tahay mid looga fiican yahay.
Madaxweyne ku xigeenka oo arrimahaasi ka hadlayayna waxa uu yidhi “Haddii maalin walba telefishanadda aan la soo joogsano qabyaalad iyo dhaleecayn joogta ah oo maan lahayn dadka iyo dalka ayaad wax ugu dhimaysaan, dhaleecayntan joogtada ah wakhtiga ay munaasibka tahay iyo marka wax la toosinayo lama diidayo, bal u fiirsada xisbiyadda mucaaridka ah afar nin oo isku xisbi ah ayaa maalin kaliya hadlaya, waar maad u kala hadhaan. dhaliisha qudheeda inta aad tashataan halka wax laga khalday muu hal qof ka hadlo, afar nin oo isku xisbi ah oo kelmad isku mid ah oo ay xukuumadda ku dhaleecaynayaan, oo nin ina adeerkii dhir-baaxay oo uu xidhay dawladdaa ka danbaysa lagu eedaynayo, Ragga madaxweyenimada doonayaa hadalkooda ha wanaajistaan ayaan leeyahay.
By: Khadar M. Dhako
Dawannews Hargeysa office
